Bugun sahifamiz orqali sizga sportning eng ommalashgan turlaridan bo'lgan dzyudo, erkin va yunon rum kurashi va sambo sport turlarini o'zida jamlagan hamda mazkur sport turlari bo'yicha mutaxassis –kadrlarini tayyorlaydigan O'zbekiston davlat jismoniy tarbiya va sport universitetining Kurash fakulteti tarkibiy qismi hisoblangan  Xalqaro kurash turlari nazariyasi va uslubiyati kafedrasi haqida so'z yuritamiz.

Ushbu kafedra ham universitetda o'z yo'nalishi bo'yicha yuqori o'ringa ega bo'lgan, etakchi kafedralardan sanaladi.
 Xalqaro kurash turlari nazariyasi va uslubiyati kafedrasi
O'zbekiston Respublikasi Prezidentining 2020 yil 4 noyabrdagi PQ-4881-sonli “Kurash milliy sport turini yanada rivojlantirish va uning xalqaro nufuzini yanada oshirish chora-tadbirlari to'g'risida”gi qarori, 2018 yil 5 martdagi “Jismoniy tarbiya va sport sohasida davlat boshqaruvi tizimini tubdan takomillashtirish chora-tadbirlari to'g'risida”gi PF-5368-sonli Farmoni hamda bu sohaga tegishli boshqa me'yoriy-huquqiy hujjatlarda belgilangan vazifalarni amalga oshirish maqsadida O'zbekiston davlat jismoniy tarbiya va sport universitetining belgilangan Nizomidan kelib chiqqan holda faoliyatini amalga oshirib kelmoqda.
Hozirda kafedraga O'zbekistonda xizmat ko'rsatgan murabbiy, karate bo'yicha xalqaro toifadagi hakam, dotsent Shuhrat Arslonov rahbarlik qilmoqda.

Ayni paytda kafedrada talabalarning tanlagan sohalari bo'yicha bilimlarini yuksaltirishda O'zbekistonda xizmat ko'rsatgan murabbiy, professor A. N. Ilov, pedagogika fanlari doktori, professor A. N. Abdiev, dotsentlar Sh. A. Arslonov, E. I. Bayturaev, N. A. Tastanov, I. B. Aliev, O. J. Dadaboev, katta o'qituvchilardan falsafa bo'yicha doktor (PhD) D. Yu. Tashnazarov, Sh. S. Tursunov, A. J. Tangriev, S. Q. Adilov, B. B. Odilov, A. I. Xolmatov, o'qituvchilardan M. A. Rajapov, S. E. Qodirov, J. N. Abdiqulov, E. S. Lyulina, ,   V. R, Ozdaeva, U. J. A. Qutbitdinov, A. B. Jumaqulov, F. O. Berdievlar faoliyat ko'rsatib kelmoqda. Ayniqsa, O'zbekistonda xizmat ko'rsatgan murabbiy, O'zbekistonda dzyudo sport turning asoschilaridan bo'lgan, II darajali “Sog'lom avlod uchun” ordeni sohibi, xalqaro toifadagi sport ustasi, universitet faxriysi, professor Ilov Arslon Nurovich 75 yoshni qarshi olayotgan bo'lsa ham hali hamon kafedrada talabalarga dzyudo sirlarini o'rgatishdan charchamaydi.
Talabalarning nazariy jihatdan bilimlarini yuksaltirish maqsadida kafedra professor-o'qituvchilari tomonidan 30 ga yaqin darslik, 850 dan ortiq ilmiy maqolalar, 100 dan ortiq ilmiy-uslubiy qo'llanmalar chop etilgan.
Kafedrada bugungacha yunon-rum kurashi bo'yicha 80 nafardan ortiq, erkin kurash bo'yicha 90 nafardan ortiq, dzyudo bo'yicha 50 nafardan ortiq, sambo bo'yicha 40 nafardan ortiq xalqaro toifadagi sport ustalari, 800 nafardan ortiq sport ustalari etishib chiqqan.
Kafedra bitiruvchilaridan J. M. Nurshin, A. Taymuradov, A. Ilov, A. Shokirjonov, N. To'ychiev, B. Haydarov, Sh. Arslonovlar sport turlari bo'yicha O'zbekistonda xizmat ko'rsatgan murabbiy unvoniga ega bo'lishgan.
Kafedra rahbari Shuhrat Arslonov boshchiligida hamkorlik aloqalariga ham alohida e'tibor qaratilgan.
O'zbekiston sport kurashlari assotsiatsiyasi, O'zbekiston dzyudo federatsiyasi, O'zbekiston sambo federatsiyasi, Respublika olimpiya zaxiralari kolleji, Chirchiq olimpiya zaxiralari kolleji, YAkkakurash sport turlariga ixtisoslashgan oliy sport mahorati maktabi bilan mustahkam hamkorlik aloqalari o'rnatilgan. Shuningdek, kafedra Mustaqil Davlatlar Hamdo'stligi davlatlari jismoniy tarbiya institutlari va akademiyalarining turdosh kafedralari bilan doimiy hamkorlik qilib keladi.